Chalo kuch khwab bunte hain...- 5 Stars

Chalo kuch khwab bunte hain,
Haqiqat ka jo paira hon,
Jo andheron ko mita dalain,
Jo rangon ka basera hon,
Chalo ik saaz sunte hain,
Jo zindagi ki leh or dhun ho,
Jo maot ka raqeeb,dushman ho,
Jo thehre pani main halchal kare,
Jo jazbaat ko mutzalzal kare,
Chalo kuch phool chunte hain,
Jo khushboo dain nihaan ker dain,
Jo tanha veeran jeevan ko,
An-ginat umeedon ka jahan ker dain,
Per khwab,saaz or phool to bas,
Kuch mubhim si tadbirain hain,
Jo kuch pal talkh haqeeqat bhula dain,
Wo paani pe tehreerain hain,
Main kab tak tum main kho jaon,
Kyun na apne aap khoju main,
Ya,
Phir main “tum” hi ho jaon.